Albisteak

Eider Perez: "Sari bat irabaztea beti da pozgarria"

Amodiozko Gutun Lehiaketa irabazi berri du

Osteguna, 2017-02-23

Bergarako Jardun euskara elkarteak Amodiozko Gutun Lehiaketaren sariak banatu zituen aurreko astean. Lehenengo saria Trintxerpeko Eider Perez gaztearentzat izan zen. Bigarren saria bitan banatu behar izan zuten. Sariaren erdia Iñigo Legorburu errenteriarrarentzat izan zen eta beste erdia Lasarte-Oriako Ane Labakarentzat. Eider Perezek azaldu digunez. "sari bat irabaztea beti da pozgarria eta izan daiteke idazten jarraitzeko motibazio eraginkor bat ere bai".

Miguel de Unamuno Saiakera Lehiaketaren edizio berri bat

Asteazkena, 2017-02-22

Bilboko Udaleko Kultura Sailak XVIII. Miguel de Unamuno Saiakera Lehiaketa iragarri du. Saiakera-lanak aurkezteko epea apirilaren 29an amaituko da. Garaile suertatzen den idazleak 6.000 euroko saria jasoko du.

'1615', Itxaro Bordaren poemekin osatutako ikuskizuna

Asteartea, 2017-02-21

Estereotipoetatik ihesi II  jardunaldiak ospatzen ari dira egunotan Bilbon. Atzo querr literatura hartu zuten hizpide. Itxaro Bordaren poemetan oinarritutako ikuskizuna iragarri dute gaurko. Biharko saioan, Bernardo Atxaga izango da protagonista. Saio denak ordu berean eta toki berean egingo dira, arratsaldeko 19:00etan Euskaltzaindiako egoitzan.

Gabriel Kortaren “Maitasunaren indarra”

Astelehena, 2017-02-20

Gabriel Kortak zazpigarren poesia liburua plazaratu du, autoedizioaren bidetik. Maitasunaren indarra izeneko liburuan bere poesiagintzaren konstanteak topatuko ditu irakurleak: eromena, baztertuaren lekua egungo jendartearen erraietan, maitasunaren papera eta definizioa, bakardadea, poesia idaztearen zentzua, estigmak, poetak egunerokotasunetik bizitzari luzatzen dion biziraupen oihua.