Albisteak

Arantxa Iturberekin "Honetara ezkero" liburua solasgai

Asteartea, 2018-04-03

Duela aste batzuk Arantxa Iturbe elkarrizketatu zuen Gotzon Barandiaranek Irakurrieran irratsaioan. Honetara ezkero (Susa, 2017) azken liburua aztertzeaz gain, Arantxa Iturberen ibilbide osoari egin zioten errepaso: lehenengo liburuak, Agurtzane Intxaurragarekin elkarlanak... Apirilaren 10ean Donostiako Udal Liburutegiko irakurle taldean izango da idazlea.

 

"Honetara ezkero", sinopsia:

Esan gabekoek, isilik gordetakoek, erdizka adierazitakoek ere moldatzen gaituzte.

“Ez dago dena kontatu beharrik”, esan ohi da, eta halaxe jokatzen dugu. “Hiztuna da pentsamendua”, ikasi genuen, baina ezinezkoa da berbetara ekartzea burura etortzen zaigun guztia; “ezta komeni ere!”, aholkatuko dizute.

Arantxa Iturberen ipuin maleziatsu hauetan ere ustekabeko asko izango dira, pertsonaiak eta gertakariak katramilatzen ikusiko dituzu isilpekoen kariaz, oker ulertuak bezainbat ager litezke susmoak. Umorezkoak batzuetan, gaiztoak sarritan.

Inkomunikazioak irteerarik gabeko kalezulo batera eraman ditzake jende arteko harremanak, ez aurrera ez atzera, krisiak bueltarik ia ez daukan tokira. Eta honetara ezkero, beharbada ez da inoren laguntzarik izango estualditik irteteko.

Denoi suertatu zaigu, noiz edo noiz, ernegaturik galdetzea: “Zer, ez al duzu ezer esan behar?”.

Bideoak

Utzi zure iruzkina
      "Hegoak _______ banizkio, nirea izango zen" (derrigorrezkoa, spam-aren kontra)