Gurebook denda itxiko den egunean, Susa argitaletxeak bere ebook plataformaren bitartez 1.000 ale saldu dituela eman du aditzera. 2011ko azaroaren 2an abiatu zuen Susa argitaletxeak ebook salmentarako plataforma. “Baziren merkatuan eta inguruan eredu zenbait, baina Susak berea landu eta asmatu zuen: DRM giltzarraporik gabekoa eta 3 euro (+BEZ) ale bakoitzaren salneurria, 2 euro idazlearentzat eta 1 argitaletxearentzat”, dio gaurko Literatur Emailuak, Susa argitaletxeak sustatzen duen blogak. “Albiste pozgarria da, gure proposamenak harrera ona izan duela berresten digulako; baina horretaz gain, euskal liburu elektronikoak erosten eta irakurtzen dituen jendea badagoela erakusten duelako”, hala dio aste honetako Emailuak. Susak bere plataforma ireki zuenetik gaur arte, denera 53 idazleren 108 titulu saldu dituzte, guztira 1.007 ale.