Komunitatea, trinkotzen

• Twitter
• Facebook

2015an zabaldu genuen Komunitatea izeneko txokoa. Euren sormen lanak partekatu nahi dituzten kideek osatzen dute atala eta, nola ez, partaide berri gehiago hartzeko zabalik ditu ateak (albiste honen amaieran duzue izena emateko azalpena.

Komunitatea ataleko kideek ekarpen ederra egin diote uberan.eus web orriari. Txema Arinas apirilean hasi zen atal honetan parte hartzen eta denbora honetan bera izan da Komunitateari arnas gehien eman dion kideetako bat. Lehen iruzkina Karlos Linazasororen 6012 (Erein) nobela laburrari eskaini zion. Geroztik hona, liburu gehiago hartu ditu hizpide. Baina literaturari buruzko bestelako hausnarketak egiteaz gain, sormen lanak ere partekatu ditu uberan.eus web orrialdeko irakurleekin. Piztia izenekoa, kasu:

---

Piztia

Piztia sortu zen

bere herriaren etxea

defenditzeko,

otsoen kontra,

sikatearen kontra,

lukurreriaren kontra,

justiziaren kontra,

.

Piztiak hondatu zituen

herriaren aziendak,

soloak,

pinudiak;

Piztiak galdu zituen

korrituak,

errentak,

interesak,

Piztiari

armak kendu zizkioten

eta eskuarekin hondatu zuen

bere herriaren etxea;

eskuak ebaki zizkioten,

eta besoarekin hondatu zuen

bere herriaren etxea.

Piztia utzi zuten

besorik gabe,

sorbaldik gabe,

bularrik gabe.

Eta arimarekin hondatu zuen

bere herriaren etxea.

Piztia hilen da,

bere arima galduko da,

bere askazia galduko da;

baina Piztiaren arima

iraunen du

elikatu zuten bihotzean.

---

Benedetti euskaraz

Amaitu berri den ikasturtean, Iban Laka izan da maiz-maiz aritu den beste komunitate-kidea. Mario Benedettiren poema euskaratuak partekatzen ari da azken boladan. Horren erakusgarri duzue Laztanen gaineko txostena, bere txokoan ipini duen ekarpen berriena. Benedetti zalea bazara, poema asko topatu dituzu Iban Lakaren tartean.

Laztanen gaineko txostena

1

Laztana hizkuntza bat da

eta zure laztanek hitz egingo balidate

nola nahi isiltzea

2

Laztana ez da

beste laztan urrun baten kopia

bertsio berria da

ia beti ondua

3

Azalaren jaia

laztana iraun bitartean

eta urrundu ahala

lizunkeria babesgabea

4

Ametsen laztanak

mirari eta xarma

akats bakarra

ukimen falta

5

Abentura eta enigma bezala

laztan hasiera

laztan bihurtu aitzinera

6

Argi dago onena

ez dela laztana bera

baizik eta bere jarraiera.

Mario Benedetti

---

Lizarren poemak

Txema Arinas bezalaxe, Lizar ezizenarekin idazten duen kidea ere udaberri partean batu zen Komunitatea atalera. 13 poema eskegi ditu orain arte. Ihes egitearena izenekoa da horietako bat:

 

Ihes egitearena

arratoiak bezala eraman gaituzte emmigratzera

eta han arratsaldea eta han gaua

beste bat ziren

hemen nire-neure haginak tragatzen ditut nahigabe

eta kalabazak eta loreak eta euren zurtoinak

baina maite-gorroto dut osteko polemika

hemen alderantziz eskapatzen naiz zugandik

brillantinaz beteta, drag-queen nortasunez

oraingoan Portugaleraino

eta ez dakit gero zer

---

Kide askoren bilgune

Eskaintza, hala ere, zabalagoa da. Atal hau zabaldu zenetik hona, asko izan dira idatziren bat partekatu duten lagunak: Txema Arinas, Lizar, Eneko Aizpurua, Miren Gorrotxategi, Urt Zubiaurre Otamendi, Eider Perez, Iban Laka, Jose Inazio Basterretxea, Edu Zelaieta, Aritz Gorrotxategi, Erisentxokoilunetik, Begoña Lasa, Martin Bidaur, Hasier Rekondo, Mikel Ibarguren, Jon Askasibar, Mikel Zumeta, Ian Sancho Linares, Ainara Maia, Ione Gorostartzu Etxebeste, Pello Otxoteko, Joseba Mikel Ugalde, Aritz Mutiozabal, Ernesto Prat Urzainki, Juan Ramon Makuso.

---

Komunitateko ateak zabalik

Komunitateko kide izateko ez da idazlea izan behar. Edonork ditu ateak zabalik. Hausnarketak, idatziak, lan literarioak, sormen lanak… partekatzeko gogoz dabilenak, txoko bat du Hitzen Uberan. Baldintza bakarra: euskaraz egitea. “Nola egin naiteke Komunitateko kide?”. Galdera hori buruan duenak uberan.eus/komunitatea helbidean topatuko ditu xehetasun denak.

---

Zer da uberan.eus web orriko Komunitatea?

uberan.eus web orrian euren sormen lanak partekatu nahi dituzten kideek osatuko dute Komunitatea.

uberan.eus web orriaren baitan propio sortu den atal honetan, beraz, sormen lan horiek denak batuko dira. Eta bertan egongo dira erakusgai.

Komunitateko kideez gain, uberan.eus web orrira hurbiltzen den edonork ere bisitatu ahal izango du uberan.eus web orriko Komunitatea.

---

Zeintzuk dira Komunitateko kideak?

- Norbanakoak. Norbanakoak dira izen-abizena duten erabiltzaileak. Komunitatea atalean, sormen lanak gehitzeko aukera izango dute. Hitzak eta irudiak baliatuko ahal izango dituzte horretarako.

- Kolektibo literarioak, elkarteak. Komunitatea atalean, sormen lanak gehitzeko aukera izango dute. Hitzak eta irudiak baliatuko ahal izango dituzte horretarako.

---

Zer egin Komunitateko kide bihurtu eta edukia gehitzeko?

Kide izateko eskaera bideratuz: uberan.eus/komunitatea helbidean topatuko duzun formularioa bete eta igorri behar duzu. Benetako datuak eman dituzula konprobatu ondoren, Komunitateko kide izateko eskaera onartuko zaizu.

Gida liburuxka bat bidaliko zaizu, eta gida horren bitartez zure sormen lanak uberan.eus orriko Komunitatera igotzeko xehetasunak jasoko dituzu.

Hortik aurrera, zure sormen lanak uberan.eus-era lotzeko aukera izango duzu.

Oharra: Ezingo da mezu iraingarririk argitaratu. Halakoetan, post hori ezabatzeko eskubidea izango du administratzaileak. Eta arazoa errepikatuko balitz, kidetza etengo litzateke.