Garazi Ugalderen poema: «Habitatzeko moduak»

Hona hemen Garazi Ugalderen bigarren kolaborazioa, Igor Estankonaren bi poemari erantzunez.

habitatzeko moduak

HABITATZEKO MODUAK

«Lurra ukitu bezain laster lurrunduko gara seguruenik

baina bitartean barre egingo dugu

eta gaztainondoaren sustraiez eginiko giltzak

beharko dira

etxeetara sartu ahal izateko».

Igor Estankona

«Hiria gorroto dudanean»

Anemometroa, 1998, Susa

 

atzeko atea

Ibaiertzeko harri epel batean eseri gara

eguna gautzen ikustera

abailtzeak argituko ote digun

igaroaren berezko neurria.

 

Urtaroak azalpean gatzatu ditugu luzaro

adarrak haizetara noragabe

betazalak beti tente

zer gerta nor iritsiko.

 

Hormarik gabeko etxeetan sinetsi arren

abaroa eskatzen dute orain giharrek

behatxulodun aterpe bat

kanporako eta barrurako leiho.

 

Horretarako adaxkak bildu behar direla

diote pareta-txoriek: geure puska zaurituak

jaso eta egongelan lur eman

har dezaten arnas ahal bezain libre.

 

Atzeko ate bat ere asmatuko diot etxeari

gaztainondozkoa aukeran

abisatu gabe sartu nahi duzunerako

badaezpadako ihesbide.

 


 

 

«Bestela dena dago lasai.

Betiko moduan eltxoak argiaren bila.

Betiko moduan beldur gozo batek gidatzen ditu

izaki gehienak.

Inurri gorriek

lur azpiko barrunbeetan sartu

eta haurdun uzten dute mundua»

Igor Estankona

«Gaua oraindik bataila irabazi barik»

Anemometroa, 1998, Susa

 

Ilargi bete bat

Bizitzak etengabe berrasmatu

behar balu bezala bere burua

ozeanoak gaziagotuz

ekaitzak norabidez aldaraziz

mareak harrotuz

bizitzak mezu argi bat balu bezala gordeta

guretzat:

ilargiaren aurpegi mehea baino ez dago zuen esku

eta hala kolonizatu dizkidate

inurri gorriek

ozeanoak eta ekaitzak eta mareak

ilargi bete bat betikotu didate

azalaren azpian


 

 Garazi Ugalderen aurreko kolaborazioak

Garazi Ugalderen poema: «Erortzeko moduak»

 

This entry was posted in Albisteak, si-Sormen lanak, Sinadurak. Bookmark the permalink.

Comments are closed.